មេដឹកនាំ​កម្ពុជា-នេប៉ាល់អះអាង​ពីការជំរុញវិ​ស័យធុរកិច្ចរវា​ងប្រទេស​ទាំងពីរឱ្យកាន់​តែប្រសើរឡើង

សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និង ឯកឧត្តម ខេ ភី សាម៉ា អូលី(The Rt. Hon’ble K. P. Sharma Oli) នាយករដ្ឋមន្រ្តីនៃសាធារណ រដ្ឋសហព័ន្ធប្រជាធិបតេយ្យនេប៉ាល់ បានបញ្ជាក់អះអាងពីការជំរុញវិស័យធុរកិច្ចរវាងប្រទេសទាំងពីរឱ្យកាន់តែប្រសើរឡើង ក្នុងខណៈបច្ចុប្បន្នទំហំពាណិជ្ជកម្មរវាងប្រទេសទាំងពីរ (កម្ពុជា-នេប៉ាល់) នៅមានកម្រិតតិចតួចបំផុតនោះ។ក្នុងខណៈអញ្ជើញជាអធិបតីរួមគ្នា ក្នុងពីធីបើកវេទិកាធុរកិច្ចកម្ពុជា-នេប៉ាល់ ដែលរៀបចំឡើងនៅសណ្ឋាគារសុខាភ្នំពេញ នារសៀលថ្ងៃទី ១៤ ខែឧសភា ឆ្នាំ ២០១៩ ដែលមានការចូលរួមពីសំណាក់ធុរកិច្ចជនកម្ពុជា និងនេប៉ាល់ប្រមាណជិត២០០នាក់នោះ ឯកឧត្តម ខេ ភី សាម៉ា អូលី នាយករដ្ឋមន្ត្រីនេប៉ាល់ បានសម្ដែងនូវសេចក្ដីសោមនស្សរីករាយយ៉ាងខ្លាំង ដែលបានចូលរួមក្នុងចំណោមអ្នកដឹកនាំឧស្សាហកម្ម និងធុរកិច្ចនៅរាជធានីភ្នំពេញ ដែលជារាជធានីដ៏ស្រស់ស្អាតនៃប្រទេសកម្ពុជា។ ឯកឧត្ដមបានមានប្រសាន៍ថា “ខ្ញុំបាននាំគណៈប្រតិភូធុរកិច្ចមួយដ៏រឹងមាំមួយជាមួយខ្ញុំ មកចូលរួមក្នុងព្រឹត្តិការណ៍ដ៏សំខាន់នេះ ចំពេលកំពុងធ្វើទស្សនកិច្ចផ្លូវការនៅកម្ពុជា ដែលជាដំណើរទស្សនកិច្ចលើកដំបូងដោយនាយករដ្ឋមន្ត្រីនេប៉ាល់”។ ឯកឧត្តមនាយករដ្ឋមន្រ្ដីបានថ្លែងអំណរគុណដល់សម្ដេចតេជោនាយករដ្ឋមន្ត្រី ចំពោះវត្តមានដ៏ខ្ពង់ខ្ពស់របស់សម្ដេចនៅក្នុងកិច្ចប្រជុំនេះ ដែលបានបំផុសគំនិតយ៉ាងជ្រាលជ្រៅ ហើយនឹងបន្តជំរុញសហគមន៍ធុរកិច្ចរបស់យើងឱ្យធ្វើការរួមគ្នា ក្នុងការសម្រេចសក្ដានុពលដ៏ធំដែលមានរវាងប្រទេសយើងទាំងពីរ ដើម្បីការអភិវឌ្ឍ។ ជាងនេះទៀតក៏បង្ហាញពីការប្ដេជ្ញាចិត្តយ៉ាងមុតមាំរបស់សម្ដេច ក្នុងការជំរុញកិច្ចសហប្រតិបត្តិការសេដ្ឋកិច្ចរវាងប្រទេសយើងទាងពីរ។ ឯកឧត្ដមនាយករដ្ឋមន្រ្ដីក៏បានប្ដេជ្ញាបង្កើតជាដៃគូរឹងមាំជាមួយសម្ដេចតេជោនាយករដ្ឋមន្ត្រី ក្នុងការជំរុញទំនាក់ទំនងសេដ្ឋកិច្ចរវាងប្រទេសទាំងពីរ ដើម្បីផលប្រយោជន៍ របស់ប្រជាជនប្រទេសទាំងពីរ។ ឯកឧត្ដមនាយករដ្ឋមន្ត្រីជឿជាក់ថាប្រទេសនេប៉ាល់អាចរៀនសូតបានច្រើនពីការអភិវឌ្ឍសេដ្ឋកិច្ចយ៉ាងឆាប់រហ័សរបស់កម្ពុជា និងការធ្វើដំណើរទៅរកភាពរុងរឿងជាប្រចាំ។ ឯកឧត្ដម ខេ ភី សាម៉ា អូលី ក៏បានអំពាវនាវជាពិសេសដល់សហគមន៍ធុរកិច្ចនៃប្រទេសទាំងពីរ (កម្ពុជា-នេប៉ាល់) ដើម្បីស្វែងរកឱកាសធុរកិច្ចរួមគ្នានៅក្នុងប្រទេសនេប៉ាល់ ហើយស្វាគមន៍ការវិនិយោគបរទេសនៅនេប៉ាល់ ដើម្បីបំពេញកិច្ចខិតខំប្រឹងប្រែងរបស់យើង។សម្តេចតេជោនាយករដ្ឋមន្ត្រី ហ៊ុន សែន បានសម្តែងនូវការស្វាគមន៍យ៉ាងកក់ក្តៅបំផុតចំពោះវត្តមាន ឯកឧត្តម ខេ ភី សាម៉ា អូលី នាយករដ្ឋមន្ត្រីនៃសាធារណរដ្ឋសហព័ន្ធប្រជាធិបតេយ្យនេប៉ាល់ ក្នុងដំណើរទស្សនកិច្ចផ្លូវរដ្ឋរបស់ឯកឧត្តម និងគណៈប្រតិភូធុរជននិងអ្នកវិនិយោគនេប៉ាល់ដែលបានអមដំណើរមកធ្វើការសិក្សាឈ្វេងយល់ដោយផ្ទាល់ពីការរីកចម្រើនរបស់កម្ពុជា។ សម្តេចតេជោបានគូសបញ្ជាក់ថា កម្ពុជា និងនេប៉ាល់ បានចាប់ផ្តើមមានទំនាក់ទំនងជាមួយគ្នាតាំងពីឆ្នាំ១៩៦៤ មកម៉្លេះ ប៉ុន្តែទំនាក់ទំនងនេះត្រូវបានផ្អាកមួយរយៈដោយសារបញ្ហាសង្គ្រាមស៊ីវិលនៅកម្ពុជា ហើយទំនាក់ទំនងការទូតរវាងប្រទេសទាំងពីរត្រូវបានតភ្ជាប់ឡើងវិញ នៅថ្ងៃទី០៧ ខែកញ្ញា ឆ្នាំ១៩៩៩ ដែលទំនាក់ទំនងនេះមានលក្ខណៈជាមិត្តភាពកាន់តែស្និទ្ធស្នាល តាមរយៈការផ្លាស់ប្តូរដំណើរទស្សនកិច្ចរបស់ថ្នាក់ដឹកនាំនៃប្រទេសទាំងពីរ។ សម្តេចតេជោនាយករដ្ឋមន្ត្រីបានបញ្ជាក់បន្ថែមដល់ធុរកិច្ចនៅក្នុងវេទិកាថា រាជរដ្ឋាភិបាលកម្ពុជាចាត់ទុកវិស័យឯកជនជាក្បាលម៉ាស៊ីននៃកំណើនសេដ្ឋកិច្ច និងជាដៃគូដ៏ពិតប្រាកដក្នុងការអភិវឌ្ឍប្រទេស។ សម្ដេចតេជោបានបន្ថែមថា “យើងបានបង្កើតយន្តការសន្ទនាមួយ ហៅថា វេទិការាជរដ្ឋាភិបាលផ្នែកឯកជនដោយមានការចូលរួមពីរដ្ឋមន្ត្រីគ្រប់ក្រសួង ស្ថាប័ន អភិបាលគ្រប់រាជធានី-ខេត្តតំណាងផ្នែកឯកជនគ្រប់វិស័យ ឯកឧត្តម លោកជំទាវ ឯកអគ្គរដ្ឋទូតប្រចាំកម្ពុជា និងតំណាងស្ថាប័នអន្តរជាតិមួយចំនួន”។សម្ដេចតេជោបានលើកឡើងទៀតថា វេទិកាវិស័យឯកជន និងរដ្ឋាភិបាលនេះ បានដាក់ចេញនូវវិធានការមុតស្រួចមួយចំនួន ដូចជា ទី១). បង្កើនភាពប្រកួតប្រជែងនៃសេដ្ឋកិច្ចកម្ពុជា។ ទី២). កែលម្អ និងលើកស្ទួយថែមទៀតនូវបរិយាកាសវិនិយោគ និងធុរកិច្ចនិងទី៣).ធ្វើពិពិធកម្មសេដ្ឋកិច្ចជាតិនិងបង្កើតការងារប្រកបដោយគុណភាពកាន់តែច្រើនថែមទៀតជូនប្រជាជនកម្ពុជា។ជាមួយគ្នានេះសម្តេចតេជោបានស្វាគមន៍ចំពោះរាល់ការសម្រេចចិត្តដ៏ឈ្លាសវៃរបស់អ្នកវិនិយោគបរទេសទាំងអស់ជាពិសេសអ្នកវិនិយោគនេប៉ាល់ដែលមានបំណងជ្រើសរើសកម្ពុជាជាគោលដៅវិនិយោគដ៏មានសក្តានុពលខ្ពស់ក្នុងការចាប់ផ្តើមឬពង្រីកអាជីវកម្មរបស់ខ្លួន។សម្តេចតេជោក៏បានលើកទឹកចិត្តដល់អ្នកវិនិយោគកម្ពុជាដែលមានបំណងចង់ពង្រីកអាជីវកម្មរបស់ខ្លួននៅក្រៅប្រទេស ពិចារណាប្រទេសនេប៉ាល់ជាប្រទេសគោលដៅរបស់ខ្លួន។ សម្តេចតេជោនាយករដ្ឋមន្ត្រីបានជម្រាបជូនធុរជន និងអ្នកវិនិយោគទាំងអស់អំពីសក្តានុពលវិនិយោគ និងឧត្តមភាពសំខាន់ៗរបស់កម្ពុជាលើចំណុចបួនសំខាន់ៗ ដែលក្នុងមាន ទីទី១. ភាពអំណោយផលនៃស្ថិរភាពនយោបាយ និងម៉ាក្រូសេដ្ឋកិច្ច។ ទី២. ការបើកចំហសេដ្ឋកិច្ចសម្រាប់អ្នកវិនិយោគទាំងអស់ដោយគ្មានការរើសអើងរវាងអ្នកវិនិយោគកម្ពុជា និងអ្នកវិនិយោគបរទេស។ ទី៣. កម្លាំងពលកម្មដែលមានភាពសម្បូរបែបនិងវ័យក្មេង ដែលក្នុងនោះប្រជាជនដែលមានអាយុ៣៥ឆ្នាំចុះ មានចំនួនដល់ទៅ ៧២ភាគរយ នៃចំនួនប្រជាជនសរុប គួបផ្សំនឹងប្រាក់ឈ្នួលដែលមានភាពប្រកួតប្រជែង និងទី៤. កម្ពុជាស្ថិតនៅលើទីតាំងជាយុទ្ធសាស្ត្រក្នុងតំបន់អាស៊ាន ដែលតំបន់នេះបាននិងកំពុងក្លាយជា“រោងចក្រនៃអាស៊ី”។ សម្រាប់ទំនិញផលិតនៅកម្ពុជាអាចផ្គត់ផ្គង់ទីផ្សារនៅក្នុងស្រុក ទីផ្សារអនុតំបន់មេគង្គ ទីផ្សារអាស៊ាន និងទីផ្សារសំខាន់ៗដទៃទៀតក្នុងពិភពលោក។ប្រមុខរាជរដ្ឋាភិបាលកម្ពុជា ក៏បានធានាជូនអ្នកវិនិយោគគ្រប់រូបនូវបរិស្ថានគ្រប់បែបយ៉ាងដែលអនុគ្រោះ និងជួយជំរុញដល់ការវិនិយោគ ពិសេសគឺសន្តិភាព សន្តិសុខ និងស្ថិរភាពនយោបាយ ក៏ដូចជាស្ថិរភាពម៉ាក្រូសេដ្ឋកិច្ច ក្របខ័ណ្ឌច្បាប់ និងស្ថាប័នដែលប្រកបដោយប្រសិទ្ធភាព តម្លាភាព គណនេយ្យភាព និងភាពអាចប៉ាន់ប្រមាណបាន។គួរបញ្ជាក់ដែរថា ទំហំពាណិជ្ជកម្មរវាប្រទេសទាំងពីរ (កម្ពុជា-នេប៉ាល់) ក្នុងឆ្នាំ២០១៧ កន្លងមក គិតជាទឹកប្រាក់សម្រេចបាន ពីររយដប់ពាន់ដុល្លារអាម៉េរិក ពោលគឺធ្លាក់ចុះ ១៧.៦ភាគរយ ធៀបនឹងឆ្នាំ២០១៦។ បើផ្អែកតាមតួរលេខទំហំពាណិជ្ចកម្មនេះ បានបង្ហាញថាទំនិញពីកម្ពុជា នាំចេញទៅប្រទេសនេប៉ាល់ រួមមានអាវធំម៉ង់តូ បន្ទះក្ដារស្ដើងៗសម្រាប់ធ្វើកុងផ្លាកេ សម្លៀកបំពាក់ស្រ្តីផលិតពីកប្បាស ស្បែកជើង ស្បែកធម្មជាតិ និងម៉ាស៊ីនភ្លើង។ ចំណែកឯទំនិញដែលកម្ពុជានាំចូលពីប្រទេសនេប៉ាល់វិញ រួមមានម៉ាស៊ីន និងក្រណាត់ជជុះ៕ដោយ៖សហការី

Leave a Reply

Your email address will not be published. Required fields are marked *